Úrræði bankanna eru fálmkennd
Ríkisstjórnin og Alþingi hafa samþykkt ýmiss úrræði til hjálpar heimilunum en auk þess bjóða bankarnir upp á sín eigin. Það er hægt að nálgast upplýsingar um úræði bankanna á heimasíðum þeirra en því miður eru þær óáreyðanlegar. Ég ætlaði að taka upplýsingarnar saman og birta í fréttabréfinu en hef því miður ekki fengið fullnægjandi svör við því sem er óljóst eða ekki er að finna á heimasíðunum. Þegar gengið er eftir upplýsingunum er einfaldlega svarað að hvert tilfelli verði skoðað fyrir sig. Það er einmitt það. Ég get því ekki ráðlagt annað en að hver og einn fari í sinn banka og reyni hvað hann getur og láti ekki fyrsta svar duga eða taki fyrstu tillögu bankans. Ef þið treystið ykkur ekki til þess að taka slaginn við bankana getið þið leitað til okkar hjá spara.is og við reynum að aðstoða. Síminn er 587 2580



Varið ykkur á verðtryggðum lánum með breytilegum vöxtum
Bankarnir bjóða upp á að erlendum lánum verði breytt í íslensk lán með lækkun á höfuðstóli. Þetta getur verið áhugaverð leið fyrir suma en gætið ykkar á að Arion banki og Landsbankinn bjóða eingöngu upp á breytilega vexti á verðtryggðu lánin. ATH. Verðtryggð lán með breytilegum vöxtum eru áhættusömustu lán sem hægt er að taka. Fyrir það fyrsta er tekin vaxtaáhætta með breytilegum vöxtum, þá er tekin verðlagsáhætta með verðtryggingunni og óbeint er einnig tekin gengisáhætta vegna þess að gengið hefur að hluta til áhrif á verðlag. Þetta var eitt sinn kallað að bankarnir væru bæði með belti og axlabönd. Í mínum huga ætti að banna lánastofnunum að taka breytilega verðtryggða vexti, svo ósvífið og siðlaust finnst mér þetta lánafyrirkomulag

Sigrum kreppuna saman!
Eftir áramótin ætla ég að blása í herlúðra og fara aftur um landið með námskeiðið Úr mínus í plús og taka sérstaklega fyrir leiðir sem hvert og eitt okkar getur farið til þess að vinna sig út úr kreppunni. Það eru til ýmsar leiðir fyrir þá sem eru skuldugir að losna úr ánauðinni, forða sér frá gjaldþroti og byggja sig upp að nýju. Þeir sem eiga sparnað eru í nokkrum erfiðleikum með að tryggja hann og fá viðunandi ávöxtun en það er hægt með útsjónasemi.
Á námskeiðunum mun ég kynna nýja útfærslu á fjárhagskerfinu, sem við köllum í dag epli & appelsínur. Ég ætla að útskýra þetta skrítna nafn í fréttabréfi eftir helgina, það verður einskonar jólasaga til ykkar lesenda. Nýja forritið er hins vegar glæsilegt og ekki aðeins bráðnauðsynlegt tæki til þess að vinna með peningana sína og ná sem bestum árangri heldur er það skemmtilegt að auki. Það hefur verið unnið mikið verk við að uppfæra kerfið og bæta við það allskonar möguleikum, eins og að reikna út alla lánamöguleika, kostnað og eignamyndun, sparnað og væntanlegar lífeyristekjur, hvernig best er að nota eingreiðslur til þess að lækka greiðslubyrði eða ná mestum sparnaði, að ógleymdri nýrri útfærslu á veltukerfinu sem er einfaldast og fljótvirkasta aðferðin til þess að greiða niður lánin.
Góða helgi,
Ingólfur H. Ingólfsson