Fréttamaður frá einni sjónvarpsstöðinni kom til mín og bað um sparnaðarráð fyrir jólin. Satt best að segja vafðist mér tunga um tönn. Jólin eru kannski ekki besti tíminn til þess að hefja sparnað og ég er næsta viss um að fáir myndu hlusta á það sem einhver myndi telja skynsamlegast ráðið – að eyða ekki um efni fram. Ég er ekki heldur viss um að það slái í gegn að vísa til inntaks jólagjafarinnar – að gefa til þess að gleðja. Jólin eru líklega notuð meira en nokkurt annað tilefni til þess að láta kastljós neyslunnar skína á sig svo allir geti virt fyrir sér velgengnina eða þrautseigjuna, fegurðina eða hamingjuna eða hvað það nú annars er sem maður vill láta ljósið skína á. Svona er neyslusamfélagið – við notum peninga til þess að kaupa okkur tákn og merki um lífsstíl. Neysla er val á lífsstíl en ekki leið til þess að fullnægja nauðþurftum. Og hvað á ég þá að segja um sparnað um jólin sem er ekki hljómlaus predikun sem engin tekur mark á heldur eitthvað sem getur hjálpað til við að lifa neysluveisluna af.

Sparnaðarráðið
Mér dettur eitt ráð í hug sem er afar einfalt í framkvæmd og getur dregið úr eyðslunni án þess að nokkur finni fyrir því og einnig hjálpað til við að greiða jólakortareikninginn. Aðferðin er þessi: Takið 10% af desemberlaununum og leggið til hliðar til dæmis inn á einhverja sparibók. Hreyfið ekki við þessum peningum fyrr en kemur að því að greiða kreditkortareikninginn í febrúar.

Þetta er allt og sumt, og munið, að einföldustu ráðin duga best. Þó að þið leggið til hliðar 10% þá eigið þið 90% af desemberlaununum eftir og þetta er svo lítill munur að það er varla orð á gerandi, flestir nota greiðslukortið hvort sem er. Hins vegar geta þessi 10% skipt sköpum þegar kemur að því að greiða kortareikninginn í febrúar.

Jólagjöfin í ár er spjaldtölva, segir í fréttunum. Mér skilst að hún kosti um 100.000 krónur. Sá sem vill gefa spjaldtölvu í jólagjöf, en hefur ekki efni á henni, hefur tvo möguleika. Annar er sá að kaupa hana á krít og setja í jólapakkann og berjast síðan við að borga af henni með háum vöxtum næstu mánuðina. Hinn möguleikinn er að semja um að allir leggi fyrir, líka sá sem óskar sér svona dýrrar gjafar, og stefna að því að staðgreiða spjaldtölvuna með góðum afslætti, kannski í apríl eða maí.

Snúum blaðinu við!
Ég ætla að gefa ykkur eitt ráð í viðbót sem kemur jólunum ekkert sérstaklega við nema hvað að það hefur eitthvað með hamingjuna að gera. Það er því miður nánast ómögulegt að láta sér líða vel, hvað þá að láta draumana rætast, ef peningamálin eru ekki í lagi. Ekki vegna þess að framtíðina eða hamingjuna sé hægt að kaupa með peningum heldur vegna þess að peningar geta staðið okkur fyrir þrifum og valdið áhyggjum. Ef peningar eru ekki notaðir rétt þá geta þeir snúist í andhverfu sína og orðið að kvöl og pínu í stað þess að létta okkur lífið og veita ánægju. Og athugið að það er ekki innkoman, tekjurnar eða fjárhæðin sem veldur heldur það sem er gert við það sem kemur inn. Notið því peningana eingöngu í eitthvað skemmtilegt. Ef þið ætlið að vera hamingjusöm, þá skulið þið sjá til þess að þið njótið peninganna sem þið eigið. Ein leið til þess að svo geti orðið er að taka aldrei lán fyrir því sem ykkur langar til þess að eignast. Það er heldur ekki nauðsynlegt því staðreyndin er sú að það er auðveldara að byggja upp sparnað en að greiða af lánum – og það merkilega er að sá sem byggir upp og lifir af sparnaði getur keypt það sem hann langar í miklu fyrr en sá sem þarf að taka peningana að láni. Hljómar einkennilega en er samt staðreynd. Ef þið vitið ekki hvernig auðveldast er að snúa blaðinu við, þá skal ég hjálpa ykkur með það. Sendið einfaldlega póst á spara@spara.is eða hringið í síma 587 2580 og pantið tíma. Þetta er kannski besta áramótaheitið sem þið getið gefið ykkur og fjölskyldunni, hver veit?

Kær kveðja,
Ingólfur H. Ingólfsson