Fréttabréfið um Andabæjarhagfræðina kallaði á nokkur viðbrögð og eina spurningu fékk ég sem ég get með engu móti litið fram hjá, fyrst ég opnaði á umræðuna, þó að færustu sérfræðingar hafi ekki fundið einhlýtt svar við henni. En það má einnig segja um fjármálaheiminn eins og hann leggur sig - með eða án Andabæjar.

Allt frá því að Carl, nokkur, Barks sagði fyrstur frá Jóakim Aðalönd árið 1947, hefur það verið mönnum hulin ráðgáta hversu ríkur hann væri og hvort hann gæti í raun og veru talist til auðmanna eða ekki. Þeir sem eru sérstaklega áhugasamir um félagsfræði og stéttaskilgreiningar geta líklegast leitað svara við spurningunni um kapítalistann Jóakim í sögunni um „The Cattle King“ sem birtist í maí árið 1967. Ég ætla hins vegar að reyna að svara annarri og stærri spurningu: Hversu ríkur er Jóakim Aðalönd? Líklegast hafa allir sem lesið hafa sögurnar um Andabæ einhvern tímann velt fyrir sé ríkidæmi Jóakims. Það er því nánast ekki til sá dónaldíski fræðimaður sem hefur ekki leitað svara við þeirri spurningu.

Það fer eðlilega eftir heimildum hversu nálægt maður kemst að áætla auðævi Jóakims Aðalandar. Vitað er að hann geymir peningana sína í risastórum geymum en það er afar erfitt að reikna út stærðina á þeim eða fjölda enda er það hluti af leyndardómum Jóakims. Vandinn er einnig mannlegur, ef svo má segja. Jóakim Aðalönd telur reglulega peningana sína en þegar hann nálgast síðustu aurana ruglast hann gjarnan á talningunni og verður því að byrja upp á nýtt.

Í þýskri útgáfu af Andabæ, sem birtist fyrst árið 1954, er þess getið að Jóakim Aðalönd hafi átt 13 trilljónir Taler og 13 Kreuzer (1 Taler = 100 Kreuzer). Önnur heimild, sem mikið er vitnað til, gefur upp nákvæmari tölu sem er: 13 trilljónir, 224 billjónir, 567 milljarðar, 778 milljónir Taler og 16 Kreuzer. Í einni bandarískri útgáfu sem fjallar um auðæfi Jóakims er þess getið að upphæðin sé: „Five Billion Quadroplatillion Umptuplatillion Multiplatillion Fantasticatillion Centrifugalillion Dollars and sixteen cents“. Þetta hljómar alveg óendanlega mikið, en hversu mikið? Þar erum við litlu nær. Í þessum dónaldísku fræðum er reyndar umdeilt hvað hinn raunverulegi gjaldmiðill Andabæjar heitir en ég notast við Taler og Kreuzer því að í þeirri mynt er fjárhæðin í það minnsta einfaldari og auðskildari en í amerísku mynteiningunni, ekki satt?

Ekki er auðveldara að reikna út auðævi Jóakims út frá þeirri vissu að peningarnir eru geymdir í risastórum tönkum því að það sem vísindamenn hafa komist næst er að stærðareiningin á þeim er gefin upp sem sex kubikhektarar. Þessi mælieining nær reyndar út fyrir rúmskyn okkar dauðlegu því að einn kúbikhektari er eiginlega ekki rúmmálseining heldur eins konar flatarmálseining í þriðjaveldi. Hvað það Þýðir, veit ég ekki en kannski veit það einhver?

Það er óumdeilt að þessi dónaldísku fræði eru bæði flókin og erfið en til þess að enda þennan vísindapistil skulum við gera ráð fyrir, til einföldunar, að auðævi Jóakims Aðalandar séu 13 trilljónir Taler og 13 Kreuzer. Umreiknað er það nálægt 500.000 fleiri peningar en til eru í heiminum, að mati færustu fræðimanna. Þetta finnst einhverjum kannski ótrúlegt en þá skulum við hafa í huga að til dæmis telur breska tímaritið The Economist að í fjármálakreppunni 2007/2008 hafi 10 trilljónir dollara gufað upp eða horfið til peningahimna. Þrátt fyrir það eru skuldir heimsins meiri en verðmæti alls þess sem framleitt er í heiminum á einu ári, eða álíka mikið á heimsvísu og skuldir Grikkja eru á landsvísu. Finnist einhverjum fjármálafræði Andabæjar vera flókin og illleysanleg, ættu þeir bara að lesa viðskiptablöð heimspressunnar.

Kær kveðja,
Ingólfur H. Ingólfsson