Í nýgerðum kjarasamningum er kveðið á um að launþegar í landinu fái hækkuð laun. Til viðbótar, er gerður samningur um að krónan sé markvisst styrkt á tímabilinu til að koma í veg fyrir verðbólgu, og verja þannig kaupmátt launþega. Þessar aðgerðir gætu verið mjög jákvæðar fyrir íslenskt efnahagslíf því þetta hvetur undir aukin umsvif í hagkerfinu.

Neyslan tekur við sér með eingreiðslum

Ef horft er á eingreiðsluna í júní þá ber einnig að horfa til þess að stór hluti fasteignaeigenda og barnafólks fær einnig eingreiðslu í ágúst. Þannig koma tvær eingreiðslur á tveimur mánuðum. Munar um minna.

Eingreiðslurnar hafa jafnan skilað sér í aukinni neyslu landans og er það mjög jákvætt fyrir hagkerfið í heild sinni. Fyrirtækin fá aukna veltu og ríkið aukningu í neyslusköttum. Með aukið fé á milli handanna er mjög líklegt að landinn leyfi sér meira í sumar en hann hefði að öðrum kosti gert.

Fyrirtæki þurfa ekki að hækka verð

Í kjölfar mikillar endurskipulagningar á kostnaðarhlið fyrirtækja eru flest fyrirtæki undir það búin að veltan verði lág á komandi mánuðum. Fastur kostnaður ss. leiga og laun hefur verið lækkuð og lán eru í farvegi hjá bönkunum. Fyrirtæki sem hafa lifað kreppuna af, eru nú rekin á mjög aðhaldssaman hátt. Samkeppni er einnig veruleg á meðal fyrirtækja við að laða viðskiptavini inn til sín og stjórnast kauphegðun að miklu leiti á vöruverði. Almenningur hefur því bætt neysluhegðun sinna verulega á undanförnum árum og greiðir því eingöngu lágmarksverð fyrir vörur og þjónustu.

Aukin neysla þarf því alls ekki að koma fram í hækkuðu vöruverði, því fyrirtækin starfa í talsverðri samkeppni hvert við annað og veltuaukningin skilar sér ágætlega niður rekstrarreikninginn sökum kostnaðaraðhalds.

Niðurlag

Með hækkun á launum gætu fyrirtæki verið sjálf að koma af stað hagvexti sem skilar sér með varanlegri neysluaukningu frá því sem nú er, og gætu þau því sjálf verið að leggja grunn að bættum rekstrargrundvelli.

Arnar Freyr Ólafsson
Forstöðumaður rekstrarsviðs
Sparifélaagsins hf