Gull er af sumum fræðimönnum talið vera hin eina sanna mynt. Það er ekki aðeins að gull hafi verið notað sem mælikvarði á verðmæti allra annarra mynta (og flestra hluta) heldur hefur það haldið verðgildi sínu í gegnum árhundruðin og því leita margir í gullið þegar pappírsgjaldmiðlar veikjast sem gefnir eru út af ríkisbönkum eða seðlabönkum.

Það er hins vegar fjarri því að gullverð sé stöðugt, þvert á móti, en það merkilega er að það sveiflast í öfugum takti við það sem gerist á almennum hlutabréfamörkuðum yfir lengri tíma litið. Í pistlinum “ Er kreppunni lokið” birti ég mynd af elstu hlutabréfavísitölunni, Dow Jones, síðastliðin 40 ár sem sýnir hvernig almennt hlutabréfaverð hefur sveiflast upp og niður á tæplega tveggja áratuga tímabili; niðursveifla árin 1964 til 1982, uppsveifla árin1982 til 2000 og svo aftur niðursveifla 2000 til dagsins í dag.

Gullverð og Dow Jones
Á myndinni sem fylgir þessum pistli má sjá hreyfingar á gullverði í samanburði við Dow Jones frá árinu 1980 til ársins 2010 (efri hluti myndar sýnir DJ, neðri hluti sýnir gullverð). Takið eftir að á þeim tíma þegar hlutabréfavísitalan hækkaði frá því sem hún var lægst árið 1982 til ársins 2000 þá lækkar verð á gulli. Eftir að hlutabréfaveislunni lauk um síðustu aldamót hefur verð á gulli hækkað mikið og farið úr 255 USD á únsuna í meira en 1.080 USD (323% hækkun). Það sama gerðist á árunum 1960 til 1980 að hlutabréf féllu en gullverð snarhækkaði, gullverð fór úr 35,27 USD únsan í 615 USD sem gerir 1.644% hækkun (gullverð var reyndar ekki gefið frjálst fyrr en árið 1968 og hækkunin árið 1980 var undantekning, árið áður var verðið 306 USD á únsuna og árið eftir 460 USD).

Hrávöru- og hlutabréfamarkaðir
Almenna reglan er sú að verð á hrávöru; eðalmálmum, olíu, landbúnaðarvörum og iðnaðarmálmum hækkar þegar DJ iðnaðarvísitalan eða almennt hlutabréfaverð lækkar. Þess vegna er reiknað með að hrávöruverð eigi eftir að hækka meira næstu árin eða kannski mestan hluta næsta áratugar. Hversu mikið er ekki hægt að segja til um en ég hef áður fært rök fyrir því að verð á landbúnaðarvörum gæti átt eftir að hækka töluvert og gullverð þyrfti að fara í 2.400 USD únsan til þess að ná verðgildi sínu frá því að það var hæst á níunda áratugnum og margir sérfræðingar sjá fyrir sér töluverða hækkun á olíuverði næstu árin.

Af hverju er ég að skrifa um gull og hækkanir á hrávörumarkaði þegar okkur er bannað að setja spariféð í annað en íslenskar krónur? Já, það er nú það. Kannski vegna þess að jörðin heldur áfram að snúast þó að við séum lokuð inni á krónueyju við ysta haf. Kannski eiga einhverjir gjaldeyri sem þeir vilja nota til þess að koma í örugga höfn eða kannski hafa bara einhverjir gaman af því að vita hvað sé að gerast fyrir utan landsteinana.



Suður-Afrískur Krugerrand

P.S.
Gullverð er mjög hátt um þessar mundir og því er almennt spáð að það muni mjög líklega leiðrétta sig (falla) niður undir 1.000 USD á næstunni, svo að það er rétt að bíða aðeins sé einhver að hugsa sér gott til glóðarinnar.

Kær kveðja,
Ingófur H. Ingólfsson